Cвященноисповедник Виктор (Островидов), епископ Вятский и Глазовский

Тропарь, глас 4.

Пра́вды Бо́жия побо́рниче/ и раско́лов обличи́телю,/ испове́дниче Христо́в святи́телю Ви́кторе,/ я́ко пресве́тлое свети́ло доброде́тельми просия́вый/ и изгна́ние претерпе́вый,/ упа́сл еси́ па́ству твою́ в Правосла́вии и благоче́стии./ Ра́дуется днесь земля́ Вя́тская,/ в ню́же восхоте́л еси́ возрати́тися/ цельбоно́сными мощми́ твои́ми,/ пра́зднующи любо́вию святу́ю па́мять твою́./ Моли́ о нас Бо́га,// с ве́рою к предста́тельству твоему́ прибега́ющих.

Иной тропарь, глас 4.

Побе́ды тезоимени́т вои́стинну,/ Ви́кторе, Вя́тская похвало́,/ у́зам и ско́рбем темни́чным вда́лся еси́ ве́ры ра́ди,/ сло́во и́стины исправля́я,/ и лесть безбо́жных посрами́л еси́,// моли́ Христа́ Бо́га спасти́ся душа́м на́шым.

Кондак, глас 8.

Побе́де тезоимени́тый,/ святи́телю пресла́вне Ви́кторе,/ победи́л еси́ гони́телей твои́х немощну́ю я́рость./ Ра́зум име́я богопросвеще́нный,/ хитросплете́нная ло́жная облича́л еси́,/ ове́ц твои́х в огра́де церко́вной соблюда́я./ Те́мже увенча́лся еси́ от Бо́га венце́м драгоце́нным.// Не преста́й моля́ся спасти́ся душа́м на́шим.

Иной кондак, глас 4.

Побе́ды вене́ц с небесе́ прие́м, пресла́вне Ви́кторе,/ просия́л еси́ уче́нии и страда́нии па́че со́лнца,/ тьму безбо́жия и е́реси отгна́в,// спаса́й ве́рою пра́зднующих па́мять твою́.

Молитва

О, свяще́нная главо́, святи́телю Бо́жий о́тче наш Ви́кторе! К тебе́, предста́телю святы́й, прибега́ем, я́ко не и́мамы дерзнове́ния ко Го́споду за премно́гия грехи́ на́ша. Ты же, о́тче святы́й, в земно́м житии́ твое́м столп ве́ры правосла́вныя быв и испове́дник до́блий, укрепи́ на́шу ве́ру, да возмо́жем противуста́ти всем ко́знем лука́ваго, испроси́ нам у Всеми́лостиваго Бо́га вся благопотре́бная душа́м и телесе́м на́шим. Це́рковь Ру́сскую от ересе́й и раско́лов сохрани́, да пребу́дет до сконча́ния ве́ка чи́стая и непоро́чная Неве́ста Христо́ва, заблужда́ющих обрати́, неду́гующих исцели́, ю́ныя просвети́, да уве́дят благоче́стия добро́ту и греха́ безобра́зие, даждь нам утеше́ние в печа́лех, пробуди́ в сердца́х на́ших покая́ние, возжги́ в сердца́х на́ших пла́мень Боже́ственныя любве́ и всем вся да́руй, я́же ко спасе́нию, и пода́ждь нам твое́ святи́тельское благослове́ние, да тем осеня́еми изба́вимся от вся́кия беды́ и напа́сти, и да бу́дем благоуспе́шны в труде́х на́ших.
Услы́ши моле́ния на́ша, всеблаже́нне о́тче наш Ви́кторе, к ра́це моще́й твои́х с ве́рою и любо́вию припа́дающих, яви́ нам многомо́щное твое́ заступле́ние, соблюди́ град твой Вя́тку, его́же возлюби́л еси́, и вся гра́ды и ве́си ру́сския от напа́стей ненаве́тны, да сла́вим ди́внаго во святы́х Свои́х Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.